Një delegacion teknik nga Grupi i Punës për ngritjen e LPIS/IACS në AZHBR po zhvillon një vizitë studimore pranë Agjencisë së Pagesave të Rajonit të Venetos – AVEPA, në Padova, Itali, për të njohur nga afër zbatimin praktik të Sistemit të Integruar të Administrimit dhe Kontrollit (IACS), si dhe organizimin e një Agjencie Pagese funksionale të Bashkimit Europian.
Vizita synon gjithashtu forcimin e bashkëpunimit ndërmjet dy agjencive dhe krijimin e urave për shkëmbim të mëtejshëm të eksperiencës dhe ekspertizës.
Kjo veprimtari është mundësuar nga projekti EUGoAL, financuar nga Ministria Italiane për Punët e Jashtme dhe Bashkëpunimin Ndërkombëtar nëpërmjet Agjencisë Italiane të Bashkëpunimit për Zhvillim (AICS) dhe menaxhuar nga CIHEAM Bari.
Mësimi nga praktikat më të mira të BE-së është një hap kyç në rrugën e Shqipërisë drejt ngritjes së një IACS funksional dhe përparimit në procesin e integrimit europian.
