Interesi i fermerëve dhe sipërmarrësve për të aplikuar në thirrjen e tretë të skemës mbështetëse IPARD 2 ka qenë i lartë pavarësisht pandemisë. Drejtorja e Agjencisë për Zhvillimin Bujqësor dhe Rural Frida Krifca thotë se më 25 janar janë mbyllur aplikimet dhe deri tani janë 369 dosje të dorëzuara, numër më i lartë edhe se në thirrjen e shkuar. Tashmë do të nisë puna për të përpunuar dosjet e për të dhënë financime mbështetëse për sektorët e fermave, vreshtarisë dhe produkteve të mishit e qumështit. “Nëse i krahasojmë këto thirrje me dy vitet e para kemi pasur një shprehje interesi më të lartë. Duke parë që kemi dalë nga një vit i pandemisë sektori i bujqësisë ka nevojë për t’u investuar”. Krifca thotë se për financimet e vogla që ofrohen nga instrumenti IPARD përpunimi i të dhënave bëhet për një kohë të shkurtër, ndërsa për aplikimet për shuma të mëdha investimi do të nevojiten 5-6 muaj kohë. “Po sjellin aplikime më të plota, nëse e krahasojmë me vitet e para aplikimet tani janë më të sakta”. Nëse do të teprojnë fonde nga kjo thirrje, një tjetër raund do të hapet në fund të vitit për t’i shkuar në ndihmë fermerëve, ndërsa Agjencia është në proces pune për të marrë miratimin e programit IPARD 3, i cili ka një fond prej 160 milion eurosh. “Do të kemi mundësinë të shtojmë dhe masa të reja dhe të çojmë investime në zona më të thella rurale”. Thirrja që u mbyll ofron 29.1 milion euro për fermerët, ku një pjesë jepet në formë grantesh e një pjesë si kredi e butë. Në thelb programi ka si qëllim modernizimin e linjave të prodhimit bujqësor, duke i dhënë bizneseve dhe fermerëve akses në financim me pak kosto.
