Në kuadër të përgatitjeve për Skemën Kombëtare të Mbështetjes në Bujqësi 2025, Agjencia për Zhvillim Bujqësor dhe Rural (AZHBR) zhvilloi takime informuese në Durrës dhe Lezhë, ku u prezantuan në detaje kriteret dhe kushtet e aplikimit për përfitim nga skema.
Gjatë këtyre takimeve, fermerët patën mundësinë të njihen më nga afër me procedurat,
dokumentacionin e nevojshëm dhe afatet për aplikim, si dhe të adresojnë pyetjet e tyre drejtpërdrejt tek ekspertët e AZHBR-së. Aplikimi do të kryhet online, përmes portalit e-Albania, nga data 14 prill, ora 08:00, deri më 30 maj, ora 24:00.
Për çdo pyetje apo paqartësi, aplikantët mund të drejtohen pranë Agropikave dhe zyrave rajonale të AREB-it, ku specialistët tanë janë në dispozicion për t’ju asistuar gjatë gjithë procesit të aplikimit. Gjithashtu, mund të na kontaktoni pa pagesë në numrin e gjelbër 0800 83 83, ose të na shkruani në adresën e emailit info@azhbr.gov.al.
